నీ శ్వాసకు నా ఊపిరే...

నీ నిదురకు నా మెలకువ జత చేసానే...
నీ కలలకు నా తేనెల శృతి చేసానే...
ఈ నేల నింగిలో ఏ పువ్వు నవ్వులో...
ఆనందం వెతికినా అది నీ మదికి నా కానుకే...
ఈ గాలి జోలలో ఏ గొంతు పాటలో...
ఆలాపన వింటినా అది నీ శ్వాసకు నా ఊపిరే...

ఉలికిపడే హృదయం

ఉలికిపడే హృదయం ఊహలు కరిగించీ...
మదనపడే నయనం కలలను కవ్వించీ...
తలగడ అడిగే తపనల ప్రశ్నలు...
అలజడి కలిగే ఆశల బరువులు...
సడిచేయక చేరవా సందెవేళ నా సరిగమ లాహిరిలో...
వదిలేయక పాడవా తేనెలవేళ  నా పదనిస అల్లరిలో...

నన్నే తడిపే నీ పేరు ప్రేమగా...

కాలాలన్నీ ఆగనీ...మౌనాలన్నీ కరగనీ...
నా హృదయం ఈ క్షణమే కాగితమైపోనీ...
దూరాలన్నీ తరగనీ...స్నేహాలన్నీ మిగలనీ...
నీలాకాశం నా కలమై కవితలు రాయనీ.... 
మెరిసే కలల మాటున కురిసే కాలం తరమగా...
నన్నే తడిపే నీ పేరు ప్రేమగా...

నను తాకే చిరుగాలులు...

కదిలే నీ కురులేగా ఈ గాలికి పరుగిచ్చెనే...
నీలాల నీ కళ్లే ఈ రేయికి వెలుగిచ్చెనే...
నడిచే నీ అందెల్లో సడులేగా ఈ రాగాల సరిగమలు...
కురిసే నీ నవ్వుల్లో సిరులేగా ఈ లోకాన  పదనిసలు...
ప్రతి చోట ప్రతి పూట నను తాకే చిరుగాలులు...

కలగంటున్నా...

కలగంటున్నా కలిసే ఉన్నా..
విడిపోతున్నా వీడలేకపోతున్నా...
మళ్ళీ విన్నా  మనసేమన్నా..
నువ్వేమన్నా నమ్మలేకపోతున్నా...
ఆ రోజే నీ చెంత వదిలేసున్నా...
నా ప్రాణం ఇపుడింత కలవరమయ్యేనా...

వెన్నెల గదికి దారెటో...

నీ మదినే దాచిన ఆ వెన్నెల గదికి దారెటో...
మరిచానే మళ్ళీ కల గని  జ్ఞాపకాల జడిలో...
నేనెవరో తెలియని ఈ కాలమెంతో ఏమిటో...
పిలిచానే నా జత చేరని స్వాగతాల ఒడిలో...
వేకువలో నీ పేరే కలవరమౌతున్నా....
నా మదిలో ఓ ఆశే ఇంకా మిగిలున్నా...

 

ప్రియనేస్తం నువ్వే...

కదిలించే కలలేవో నడిరేయి జతలో...
మదిదోచే నీ నవ్వే వరమైన శృతిలో...
నా కోసం విరిసావే ప్రియరాగం నువ్వే...
నాలోన నిలిచావే ప్రియనేస్తం నువ్వే...
గతమైన పూదోట చూపించే బాట...
సగమైన  ఈ ప్రేమ వినిపించే పాట...