వినగలదా నా మౌనం ...

మనసిక పలుకదని అలుగదని ఘడియ ఆగక పిలువదని తెలిసినా
ఈ నిమిషం వదలదే నా  ప్రాణం...
చలి వేణువు తాకదని తెర తీయని తిమిరం తప్పదని కలవరమా
ఓ క్షణమా నీ హృదయం...
వీడలేని వైశాఖం వీడుకోలు తెలిపితే వినగలదా నా మౌనం ...

పరిణామాలు ఎరుగవెందుకు...

అహాల ఊయలూగు, ఆడదాని హృదయ సీమ ఆసామీ...
మమత చీల్చుకున్నా మనిషివి కాలేదా...
వలపు పంచుకున్నా విలువలు కనలేదా...
అడుగు ముందుగా...
మనసు నిండుగా...
వారథివై నడపమని దివి నుండి పంపినా...
దిశను మార్చుకుని...
తరతరాల దశలు మారుస్తూ...
పతనం వైపు నడిచేవెందుకు...
పరిణామాలు ఎరుగవెందుకు...

ఏది ఆ జీవం

బలహీన క్షణాలు బరువులైపోతుంటే...
రాయి లాంటి గుండె కరిగి ధారలైపోతుంటే...
కనులనెపుడు తడిమాను తడి తడిగా తగిలినవి...
మనసునెపుడు అడిగాను మునుపటిలా లేవు అని...
వేళ దాటి వేళ...
అడుగు వెనుక అడుగు...
వడివడిగా సాగి...
కాలాన కలిసి...
గమ్యాలు చేరినా...
ఏది ఆ జీవం...
ఎక్కడుంది జవసత్వం...